Tryggja þarf framboð á hentugu húsnæði fyrir aldraða og öryrkja. Sérstaklega þarf þó að fjölga hjúkrunarrýmum og stytta þar með biðlista eftir hjúkrunarrými.
Æskilegt er að fólki sé gert kleift að búa sem lengst heima en þá þarf jafnframt að efla heimaþjónustu.
Aldraðir eiga að geta starfrækt sjálfstæð rekstrarfélög sem henta þörfum þeirra um búsetu og þjónustu.
Húsnæði sem víða er til staðar, en er ekki nýttt, mætti hugsa sér sem heimili fyrir aldraða með mismunandi þjónustustigi.
Styðja þarf vel við  félagsstarf aldraðra og öryrkja og annað það sem tryggir sem best þátttöku þeirra í þjóðlífinu.
Við teljum mikilvægt að eldra fólk og öryrkjar komi að ákvörðunum og hafi áhrif á sveitarstjórnarmál jafnt sem önnur þjóðfélagsmál.

ATVINNUMÁL

Opinber rekstur verði hagkvæmur fyrir borgarbúa
Góð þjónusta borgarinnar þarf að vera tryggð óháð rekstrarformi. Frjálslyndi flokkurinn telur góðan rekstur borgarinnar á flestum sviðum megi bæta og að ábyrgð stjórnenda fyrirtækja borgarinnar verði að vera skýrari. Einkaframtakið fái sitt svigrúm og skoðaðar verði leiðir til hagræðingar, en ekki í anda einkavæðingar síðustu ára og áratuga. Opin umræða og fagleg stjórnsýsla gegnumlýsi starfssemi borgarinnar.
Tenging útsvars við  málaflokka verði gerð skýrari og fjárframlög til stofnana og fyrirtækja borgarinnar verði þannig afmörkuð í  samræmi við settan ramma.

Efling atvinnulífs í borginni.
Í Reykjavík þarf með dirfsku og áræðni að vekja borgarana til átaks í úrræðum.
Grunnatvinnuvegir á borð við sjávarútveg eiga erindi við höfuðborgina. Iðnaðarframleiðsla þarf að eflast enn frekar og samtvinnast þekkingariðnaði. Ferðamannaiðnaðurinn verður vaxtabroddur og hlúa þarf að þeirri starfssemi.
Reykjavík á að verða griðarstaður sprotafyrirtækja og Frjálslyndi flokkurinn vill sækja fram með  atvinnusetrum í samstarfi við Orkuveitu Reykjavíkur. Sprotafyrirtækjum verði veitt aðgengi að ódýru rafmagni og interneti. Með  því að hlú að atvinnusköpun getur Reykjavík orðið vaxtabroddur atvinnu að nýju. Það er hlutverk sem Frjálslyndi flokkurinn vill sjá höfuðborgina skapa sér.
Áherslur í atvinnulífinu eiga almennt að færast í austurátt og styðja þarf við þá viðleitni með öflugri samgönguæðum. Almenningsamgöngur þvert á úthverfi borgarinnar þarf að bæta og létta á umferð sem í of miklum mæli fer um miðborgina.
Atvinnuúrræði fyrir öryrkja sem og eldri borgara þurfa aukið rými innan borgarmarkanna. Við þurfum að veita þessum verðmætu einstaklingum tækifæri sem leyfir þeim að njóta sinna möguleika og opna þeim leiðir til að leggja fram til samfélagsins.
Efla þarf samvinnu háskólaumhverfisins og atvinnulífsins í verki. Reykjavíkurborg getur til dæmis aukið samstarf sitt við háskólaumhverfið varðandi þróun og notkun rafbíla. Reykjavík á að ganga á undan með góðu fordæmi og nýta bæði orkulindir okkar og mannauð.
Með kröftugu atvinnulífi og bættum samgöngum færist nýr neisti í borgina. Hér höfum við tækifæri til að skapa okkar framtíð, hér höfum tækifæri til að  leggja grunnstein að nýrri framtíð fyrir borgina.

UMHVERFIS-OG ORKUMÁL

Orkuveitan og Landsvirkjun verði áfram í eigu almennings
Frjálslyndi flokkurinn leggst alfarið gegn einkavæðingu Orkuveitu Reykjavíkur og Landsvirkjunar og varar við því að fleiri auðlindir almennings komist í hendur fárra.
Orkuveita Reykjavíkur er mjög blómlegt fyrirtæki sem gefur góðan arð, og því leggst Frjálslyndi flokkurinn gegn hlutafélagsvæðingu þess eða öðrum breytingum á rekstri. Sökum endurtekinna ásakana um slæma stjórnsýslu Orkuveitu Reykjavíkur leggur Frjálslyndi flokkurinn til að óháð rannsóknarnefnd rannsaki störf stjórnenda Orkuveitu Reykjavíkur til að útkljá sannleiksgildi þessa orðróms.